Kinumpirmar kan National Bureau of Investigation (NBI) na an naglilibot na “kill threat” video ni Bise Presidente Sara Duterte laban ki Pang. Si Ferdinand Marcos Jr., First Lady Liza Araneta-Marcos, asin si dating House Speaker na si Martin Romualdez tunay asin bakong gibo nin artificial intelligence.
Sa hearing kan House Committee on Justice, sinabi ni NBI Agent John Mark Calilung na nag-agi sa mahiwas na eksaminasyon an nasabing video sa lindong kan Affidavit of Authentication of Digital Evidence.
An video ginibo kan Nobyembre 23, 2024, kasabay kan pagdetenir kan hepe kan bise presidente, si Zuleika Lopez, pagkatapos na makuang nag-uulog-ulog sa Kamara de Representantes.
An nasabing video liwat na ipinaluwas durante kan impeachment proceedings, kun saen nadadangog si Duterte na naggigibo nin makusog na mga pahayag asin soboot nagbabanta sa mga nabanggit na opisyal.
Sinabi ni Calilung na an NBI nakipag-olay sa Meta tanganing mapreserbar an orihinal na kopya kan video, kabali an URL, screen recording kan livestream, asin hash value computation—sarong digital na “fingerprint” na nagbabago kun an file pig-eedit.
Mientrastanto, sinabi ni NBI Director Melvin Matibag na nagpapadagos pa an saindang imbestigasyon ngani na mabisto an indibidwal na suboot nakaolay kan bise presidente dapit sa nasambitan ng huma.
Dugang pa kaini na kabale sa pig-iimbestigaran an nagkapirang mga indibidwal na may dayupot na relasyon sa bise presidente, kabale na an mga presente asin dating miembros kan Vice Presidential Security and Protection Group (VPSPG).
Base sa imbestigasyon kan NBI, pigkokonsiderar na seryoso an pananakot, kaya nagsangat sinda nin kaso para sa mga grabeng pananakot asin pag-incite to sedition.
An mga awtoridad nagpapadagos pa sa pag-imbestigar kan lakdang kan insidente, orog na ta ini imbuelto an ikaduwang pinakahalangkaw na opisyal kan nasyon.
