Nag promisa si North Korean leader Kim Jong Un nin marahay na buhay para sa mga pamilya kan mga suldados kan North Korean na nagadan mantang nakikipaglaban para sa Russia sa gyera kontra sa Ukraine, susog sa report kan state media kan North Korea.
Ginibo ni Kim an pahayag makalihis ining makipaghilingan sa mga nawalat na pamilya kan mga suldados asin ipinahayag an saiyang kamunduan sa pagkagadan kan mga ini.
Sigun ki Kim, dae man nagwalat nin surat sa saiya an mga suldados alagad para sa saiya garu na sana man na pinagtiwala kan mga ini sa opisyal an saindang mga kaparientes kabali na an mga pigpapadaba na mga aki.
Ipinahiling man sa state television kan North Korea na lumuhod pa sa atubangan ni Kim an mga nawalat na pamilya kan mga suldados na labi an pagdadalamhati.
Sigun sa sarong dokumentaryo na ipinaluwas kan North Korea, nakisumaro an saindang mga tropa sa inaapod na “Operation Kursk Liberation” tangani itaboy an mga pwersa kan Ukraine gikan sa rehiyong Kursk kan Russia.
Bagaman dae pa nabeberipika kan mga independent agency an mga eksenang ipinahiling sa dokumentaryo.
Alagad kinumpirma man kan report na ipinadara ni Kim an mga suldados sa Russia kan nakalihis na Agosto 2024, duwang bulan makalihis ining magtinta nin kasunduan sa depensa kaiba si Russian President Vladimir Putin. Kun saen nagpakol sa pigkakarkulong 600 sa 15,000 North Korean troops an nagadan, sigun sa intelligence kan South Korea.
Mas halangkaw man an tantiya kan Western intelligence na nagpakol na sa 6,000 an kabilugang casualties. Sa ngunyan, nakatalaang liwat na maghilingan sinda Kim asin Putin sa China sa masunod na semana sa sarong military parade komo paggirumdom sa pagtatapos kan World War II.
