NAGA CITY- Nagin marhay man soboot an kita kan mga Tricycle driver sa siyudad nin Naga kan nakalihis na Holiday Season.
Sa entrevista kan Bombo Radyo Naga ki Gil Belen, FETODA President sa siyudad nin Naga, sinaysay kaini na huli sa pagdagsa kan kadakol na mga tawo sa Naga City mas nagin paborable man an kita kan mga tricycle driver.
Alagad sigun ki Belen, nagin dakulang problema man kan mga ini an labing traffic na namatean kan nakalihis na kapaskuhan asin Bagong taon nin huli ta labi ang dinarang abala bako sana sa sainda kundi magin sa mga pasahero.
Dugang pa kan opisyal, nanutaran man an presensiya kan mga kolurum na tricycle driver na kun saen nakikiagawan soboot sa mga lehitimong nagpapasada.
Pigtawan duon pa ni Belen na makalihis na igwang nadakop na tricycle driver na nag-overcharge dae naman soboot ini nadugangan pa.
Mientrastanto, makalihis an kasiributan mawot man kan opisyal na liwat na magkaigwa nin dialogue para sa mga baguhan na tricycle driver sa siyudad nin Naga tanganing ma-orient an mga ini sa mga panundunan.
Sa ngunyan, pig-abisuhan na sana liwat kaini an mga tricycle driver na likayan an mararaot na gibuhon tanganing dae mabugtak sa alanganin na sitwasyon.
