Kinumpirmar kan Philippine Amusement and Gaming Corporation (PAGCOR) na nagbagsak an saindang kita makalihis halion an mga link kan online gambling sa mga e-wallet platforms.
Ini an kinumpirmar ni Atty. Jessa Mariz Fernandez, Offshore Gaming Licensing Assistant Vice President, sa pagdangog kan Committee on Games and Amusement.
Sigun ki Fernandez, nalugi nin haros 40 hasta sa 50 percent an kita kan PAGCOR sa laog kan duwang semana makalihis na i-delist an mga online gambling gikan sa mga payment platforms.
Ipinunto kan opisyal na an datos an gikan sa accounting records asin Electronic Gaming Licensing Department kan ahensya.
Bagaman naka-eksperyensya nin pagkalugi an korporasyon, nilinaw ni Fernandez na bakong total ban an mawot kan PAGCOR kundi mahigot na regulasyon sa industriya, alinsunod sa naenot na pahayag ni Chairman Alejandro Tengco.
Pighurot ni Senador Erwin Tulfo, chairman kan komite, na an pagbagsak kan kita an patunay na may epekto an nagin lakdang kontra sa online gambling, partikularmente sa paggamit nin e-wallets sa mga transaksyon.
Mientrastanto, isiniwalat ni Senadora Risa Hontiveros na nagagamit pa man an mga e-wallet platform para sa pagdeposito asin pag-withdraw sa laog mismo kan mga online gambling platform.
Sigun sa senadora, posibleng umabot hasta sa anom na digit o hasta sa P500,000 an nailuluwas asin nailalaog sa mga transaksyong ini.
Ipinaliwanag kaini na kun sa online banking, enkaso sumobra nin P50,000, dae na pwedeng makapag-transfer, alagad sa e-wallet platforms, posibleng magluwas-laog nin hasta sa kabangang milyon para sa pagsusugal.
Mientrastanto, paiisyuhan kan komite nin show cause order an opisyal kan Meta Philippines huli sa dae pag atendir sa pagdangog dapit sa online gambling.
Sa surat ki Senador Erwin Tulfo, sinaysay ni Genixon David, public policy manager kan social media giant, na nasa Singapore asin Amerika an saindang authorized representatives kaya man dae naka atendir. Siring man, prepado sindang makipag meetng ki Tulfo asin magsumiter nin position paper.
Ikinaanggot ini ni Tulfo asin pighurot na garu nagdidikta an Meta sa Senado. Pinatanidan kaining pwedeng ipaapod asin ipakulong an opisyal kun padagos na dae igagalang an kumite.
