Nagtitinir na nasa stable na kondisyon ni Pope Francis mantang padagos na pigbubulong para sa double pneumonia na saiyang pigsasapo sa haros tolong semana.
Sigun sa Vatican, dae na ini nagkaigwa nin panibagong problema sa paghangos kan nakalihis na Miyerkules asin nakapagtrabaho na man ini nin kadikit mantang nakatukaw sa sarong tukawan sa bilog na aldaw.
Alagad pigsaysay man kan mga doktor na nagtitinir na guarded an saiyang kamugtakan na boot sabihon dae pa man ini dagusang salbado sa mga peligro.
Liwat na pigsasairarom si Pope Francis sa non-invasive mechanical ventilation tuyong bangi tanganing makatabang sa saiyang paghangos.
Enkaso dae man naka-ventilation, pigtatawan ini nin halangkaw na daloy kan oxygen sa paaagi kan sadit na tubo sa saiyang dungo.
Huli man sa kondisyon kan Santo Papa, dae ini nakaatender sa mga importanteng pangyayari sa Simbahan kabali na an Ash Wednesday service kun saen niribayan ini ni Cardinal Angelo De Donatis.
Sa ibong kan saiyang kondisyon, nakiparte si Pope Francis sa Ash Wednesday service gikan sa saiyang hospital suite.
Sa ngunyan, padagos pa man giraray na pigbabantayan an kondisyon kan Santo Papa mantang padagos an pagbulos kan pagpapangadyi para digde.
