NAGA CITY- Nagin mahimpis soboot an mga bareta sa nasyon kan Indonesia dapit sa pagkakadakop ki dismissed Bamban Mayor Alice Guo.
Sa report ni Bombo International News Correspondent Rudy Celeste gikan sa nasyon kan Indonesia, sinaysay kaini na nagin discreet magin an local media sa anuman na bareta sa paghahanap hasta sa dagusang maarestrar kan Police attache sa Indonesia an wanted na si Alice Guo.
Nagpapahiling sana soboot ini kun gurano kahigot an ginibong koordinasyon kan mga otoridad sa pag-ultanan kan Pilipinas asin Indonesia tanganing mahanap an nagdulag na dating alkalde.
Sigun pa ki Celeste, an sitwasyon na ini nagpapahiling kun gurano ka-importante an koordinasyon sa mga pagtaraid na nasyon para sa pagdakop sa mga pugante.
Nagpapatotoo soboot ini sa pusog na relasyon kan Indonesia asin Pilipinas sa pagresolbar sa kanya-kanyang problema.
Sa ibong na lado, marhay man soboot an kamugtakan kan mga Pilipino sa Indonesia alagad dae malilikayan an mga problema na nagbubungkaras na mawot man na masolusyunan kaini tanganing mas mapamarhay pa an buhay kan mga Pinoy na yaon na nasambitan ng nasyon.
Sa ngunyan, hagad na sana kaini an mas pusog na relasyon sa pag-ultanan kan Indonesia asin Pilipinas na dakulang bentahe para sa gabos na mga Pilipino na nagtatrabaho o naka-istar sa Indonesia.
