Pinahimutikan kan sarong constitutional law expert na dae soboot pwedeng pakiaraman kan hudikatura, partikularmente kan kataastaasang hukuman an isinasagibong pagproseso kan ‘impeachment’ kontra ki Vice President Sara Duterte.
Mahigot na inihayag ni Atty. Jennifer Reyes, eksperto pag abot sa saligang batas an saiyang paglilinaw na an Korte Suprema an may karapatan tangani magsagibo ini nin sadiring lakdang dapit sa proceedings kan impeachment.
Soboot an siring na klase nin pagdangog o paglilitis sa sarong opisyal kan gobyerno, dawa pa sadiring inisytabo o ‘sui generis’ kan senado, dae pa man ini ‘exempted’ sa judicial review kan nasambitan ng sangay kan gobyerno.
An saiyang pahayag na ini an pigkonektra sa nangyari na pagproseso kan impeachment proceedings kun saen nabanggit an manungod sa sarong posibleng pagbasehan na kaso sa Estados Unidos.
Kaya man huli digde, mahigot pang sinaysay kan nasambitang abogado na enkaso mahilingan nin iregularidad o pagbalgar sa saligang batas an pagsasagibo kan impeachment, an Korte Suprema an pwedeng umaksyon manungod digde.
Soboot posibleng isugo kan kataastaasang hukuman na ini an maipawarang bisa asin man maipabasura na sana sa oras na mapatunayan asin mapag-araman na dae naayon sa probisyon kan ley an pagpapadagos kan impeachment proceedings.
Kaya man saiyang pigtawan duon na dae akma asin salang sabihon na an hudikatura an mayong karapatan manungod sa proseso kaini sa kadahilanan na ikinukunsiderar ini komo sarong political process sana.
Mientrastanto, magigirumduman na kain nakalihis na aldaw, igwang grupo kan mga abogado, sa pangengenot ni Atty. Israelito Torreon na nagsunad nin petisyon sa Korte Suprema.
Kun saen saindang isinumiter an petisyong obhetong maipawara asin maibasura na sana an ‘impeachment trial’ kontra ki Vice President Sara Duterte.
Nagtutubod an lado na ‘invalid’ an impeachment complaint asin mayo na soboot bastante na oras tangani maipagpadagos an impeachment proceedings sa pagtatapos kan 19th congress.
Alagad sa presente, tuninong pa man an Korte Suprema asin dae pa man nagluluwas nin anumang desisyon o resolusyon manungod digde.
