Aram baya nindo mga ka-bombo, apwera sa pagluwas asin paghibi kan baby, may iba pa palan na mga tagpo na posibleng mangyari sa sarong paanakan sa Santiago, Isabela.
Siring na sana kan pagkuwelyo kan sarong nangangaking mommy sa sarong komadrona na busy na man sa pagkua nin video sa saiyang cellphone.
Mahihiling na tutok an komadrona na si Lourdes sa pagkua nin video mantang nangangaki an sarong ginang.
Sa tindi man kan pag-iri kan ginang, napakapot pa ini sa kuwelyo ni Lourdes na pirang beses napa-atras asin abante kun nahahatak kan mommy. Alagad si Lourdes, dae pa man nagpaawat sa pag-video.
An iba pang komadrona na nagpapangaki ki mommy, dae mapugolan na mapangirit sa eksena. Alagad bako palan na “ordinaryong” pasyente si mommy para ko Lourdes–nin huli ta mag-ina palan an duwa.
Asin an baby na iluluwal ni mommy, an magigin enot na maku-apo ni Lourdes.
Sa huri, matrayumpo man na nangaki si mommy, asin opisyal na lola na si Lourdes.
Kun tutuuson, sanay na soboot sa siring na mga eksena an mga staff sa nasambitan ng paanakan. Kun minsan, may mga nasisipa pa soboot sa sainda kang nangangaki asin igwa man nin nakakarigos kun magputok an “panubigan” kan mommy. Alagad ok sana sa sainda an gabos basta matabangan na salbadong mangaki an mga mommy asin an saindang baby.
