Pag-atras kan mga investor sa nasyon kurapsyon an saro sa hiniling na rason.
Sa intrevista kan Bombo Radyo ki Dr. Emmanuel Onsay, CPA , Economist, kadaklan sa mga investors mga Pilipino kaysa sa mga dayuhan.
Dakula an epekto kan pulitika sa mga namumuhunan sa nasyon orog na sa ngaran nin korapsyon huli ta dipisil ipagkatiwala an Capital kan mga ini sa sarong lugar na talamak an kurapsyon asin posibleng dai maging stable an saindang negosyo sa Pilipinas.
Apwera sa pulitika, igwa man mga economic policies na dai man naging epektibo asin nakakaapektar sa paglago kan mga negosyo.
Kun ikukumparar an kamugtakan kan nasyon sa iba pang mga nasyon partikularmente sa nasyon kan Vietnam, Indonesia asin Malaysia, kadikit pa man giraray an mga negosyo sa laog kan Pilipinas.
Segun ki Onsay, dai kayang iakomodar an numero kan mga naghahanap nin trabaho kan numero kan mga naitugdok na mga negosyo sa Pilipinas.
Kulang an mga oportunidad para sa mga naghahanap nin trabaho dawa na ngani igwa nin mga ikinukundusir na Job Fairs an Department of Labor and Employment o DOLE asin an iba pang mga pribadong kumpanya, huli ta kadaklan sa mga negosyo mga MSMEs na kun sain kadikit sana an mga kinakaipuhan na obrero.
Dugang pa ni Onsay, taon -taon kadakol an nakakagradwar sa pagklase alagad kadikit an oportunidad sa trabaho rason kan pag-ako kan mga aplikante sa mga trabahong dai man angay sa saindang tinapusan na kurso.
Pangapodan na sana ni Onsay na dai mawaran paglaom an mga naghahanap nin trabaho orog na an mga bagong gradwar.
Dapat na igwa nin panlaban na soft skills an aplikante sa iba pang kaparehas na mga aplikante tanganing mahire sa kumpanyang inaaplayan asin enkaso man dai maako sa kumpanya, pweding hanapon an oporunidad sa ibang lugar tanganing makakua nin trabaho.
