Nanganganib magadan an nasa labi 14 million katawo paglaog kan taong 2030 huli sa pagbuwag kan administrasyon ni US President Donald Trump sa US Agency for International Development (USAID).
Ini an basado sa pag-aadal na piglathala sa prestihiyosong Lancet medical journal kasabay kan pagtiripon kan business leaders para sa UN conference sa Spain ngunyan na semana na obhetong mapakusog an nagluluyang aid sector.
Napag-araman sa pag-aadal nasa one-third sa nasambitan ng numero o labi 4.5 milyong aki, edad 5 pababa an magagadan sa 2030 o 700,000 aki kada taon.
Sa sarong pahayag, sinaysay kan co-author kan Lancet report na si Davide Rasella, para sa mga low asin middle income countries, maiaarog an nakakagimbal na resulta kan pagbuwag kan US aid agency sa global pandemic o dakulang armed conflict.
Sinaysay man kaini na nakaambang mauntok asin mapawalang saysay an duwang dekadang progreso sa salud sa mga vulnerable populations.
Pigkakarkulo man kan grupo kan researchers na base sa datos gikan sa 133 nasyon, napugolan kan USAID funding an 91 milyong pagkagadan sa mga nag-uuswag na nasyon sa pag-ultanan kan 2001 asin 2021.
Marurumdoman, naenot ng sinaysay ni US Secretary of State Marco Rubio na kinanselar kan administrasyon ni Pres. Trump an labi 80% kan gabos nin mga programa sa USAID.
