Dumagundong an entablo kan supergroup na BTS makalihis dumugon kan mga “ARMY” kun sain pigka karkulo na nasa 260,000 fans an nag atindir sa saindang comeback concert sa Gwanghwamun Square sa Seoul, South Korea kan nakalihis na Sabado, March 21, 2026.
Habang milyon-milyon pa an nagdalan sa paagi kan online livestream. Magigirumduman na temporaryong nag-ontok an grupo kan 2022 tanganing matapos an saindang mandatory military service.
An engrandeng konsyerto ginibo harani sa makasaysayan na Palasyo nin Gyeongbokgung, na orog pang nagsisimbolo kan saindang pagbalik bilang inaapod na “Kings of K-pop.” Ipinahiling kan BTS an saindang bagong album na “ARIRANG,” na marikas na nakabenta nin haros apat (4) milyon na kopya sa enot na aldaw sana.
An album nagpapahiling nin mas maygurang asin mahiwas na estilo kan saindang musika. Alagad, nagkaigwa nin sadit na pag-atraso pagkatapos na an lider na si RM nalugadan an saiyang buol durante kan mga pag-ensayo, na naglimitar kan nagkapira sa saiyang mga hiro sa entablado. An konsyerto iyo an kapinunan kan saindang 82-petsa na paglibot sa kinaban, na piglalaoman na magdadara nin dakulang kita asin pwedeng makaribal sa darakulang paglibot arog kan ki Taylor Swift.
Mientrastanto, mahigot na seguridad an pig-implementar kan mga awtoridad sa lugar, kabale na an pagsara kan nagkapirang tinampo asin establisimiento. Mantang ini nagcausa nin kadikit na inkumbinyente, an kabilogan na pangyayari nagin mapanggana. Sa ibong kan halawig na pag-ontok, pinatunayan giraray kan BTS an saindang makusog na impluwensya pag-abot sa musika asin kultura.
