Dae mababa sa 23 na katawo, kaibahan an apat na aki an binawian nin buhay mantang kadakol pa an nairido sa saro sa pinakadakulang pag-atake kan Russia sa kabisera kan Ukraine puon pa kan bulan nin Hulyo.
Sigun sa militar kan Ukraine, naggamit an Russia nin haros 600 drones asin labi 30 ballistic asin cruise missiles sa pag-atake kun saen iyo man an pinakamahwas ngunyan na bulan.
Nagpahayag man nin matinding pagkabahal si European Commission President Ursula von der Leyen makalihis an pag-atake kan Russia sa kabisera kan Ukraine puon pa kan bulan nin Hulyo.
Duwang missile an nagtama sa rayong 50 metro gikan sa opisina kan European Union sa Kyiv, sa laog sana nin 20 segundo, sigun sa report. Naraot an opisina kan EU delagation kun saen mayong naireport na nagadan sa kabuhanan kan mga diplomat.
Inapod ni von der Leyen an insidente komo “pinakamalupit na pag-atake” sa Kyiv sa mga nakalihis na bulan, asin nangapodan nin mas matibay na suporta para sa Ukraine sa tahaw kan padagos na agresyon kan Russia.
