NAGA CITY-Arestado an apat na drug personalities sa pigkondusir na buy bust operation sa Purok Baybayin 2, Metropolis, Barangay Ibabang Dupay, Lucena City.
Binisto an mga suspek na sinda Raymundo Magugat, 55-anyos; Antonio Riza, 46-anyos, Rosalie Baldonado, 32-anyos asin Eyatid Mogol, 32-anyos.
Sa nagunong impormasyon kan Bombo Radyo Naga, napag-araman na pigkondusir an operasyon kan pigsarong pwersa kan Lucena City-PNP, Philippine Drug Enforcement Unit (PDEU) asin kan Provincial Intelligence Branch (PIB).
Target kan operasyon si Magugat na marikas na naarestar makalihis na makabakal saiya an police asset nin sarong sachet nin pigtutubodang shabu.
Apwera saiya, pig-arestar man kan mga otoridad an tolong mga suspek na yaon sa lugar kun saen pigkondusir an operasyon na nakunan man nin mga droga asin mga drug paraphernalia.
Sa kabilugan, nag-abot an mga nakumpiskar na iligal na droga sa gabat na 135.4 grams asin kantidad na P250,490.
Nagtitinir na sa kustodiya kan mga otoridad an mga suspek na nahahampang sa kasong pagbalgar sa RA 9165 o an comprehensive dangerous drugs act of 2002.
