Pig-anunsyar kan Philippine National Police (PNP) na nagtalaga sinda nin 37,750 na mga pulis sa irarom kan Oplan Balik-Eskwela 2025–2026, sa bilog na nasyon komo parte kan salbado na pagbubukas kan klase ngunyna na Lunes, Hunyo 16, 2025.
Sigun sa PNP, babantayan kan mga pulis an nasa 45,974 na kabilogang eskwelahan kabali na digdi an 38,292 na mga public schools asin 7,682 na private schools.
Magkakaigwa man nin 5,079 na mga police assistance desk na pangangasiwaan kan 10,759 pulis, mantang 10,687 an masagibo nin mobile patrols kaiba pa an 16,366 na foot patrols.
Sa datos kan Polisya pinakadakulang deployment kan mga pulis an nasa Central Visayas na igwa nin 7,366 pulis, Metro Manila: 4,323, Bicol Region: 2,962, Eastern Visayas: 2,376, asin Bangsamoro Region: 2,898 pulis para sa 657 na eskwelahan.
Enot na digdi, sinaysay ni PNP Chief Gen. Nicolas Torre III, na an kasalbadohan kan mga estudyante, paratukdo asin mga school staff an saindang pangenot na obheto para sa pagpupuon kan klase.
