Narekober an labi 40 lawas gikan sa nagyeyelong Potomac River kun saen nagbagsak an wreckage gikan sa US plane crash base sa datos ngunyan na aldaw nin Biyernes, Enero 31. Mantang nasa 14 na katawo man an nagtitinir na missing.
Dakulang angat man an kinakahampang kan divers na nagpapahaloy sa pagrekober sa mga bangkay kan mga biktima sa plane collision huli sa intense mud o dalnak, zero visibility, huma kan kontaminasyon gikan sa fuel asin debris kan naraot na passenger plane asin military helicopter.
Ngunyan man, narekober an black boxes gikan sa 2 aircraft asin piglalaoman na mailuluwas na an preliminary report sa laog nin 30 aldaw. Naenot nang pigkumpirmar ni US President Donald Trump na mayong survivor sa malagim na plane crash na naggadan sa kabilogang 67 katawo.
Pira sa mga napag-araman na binawian nin buhay sa plane crash an groom-to-be na piloto, aki kan sarong Indian immigrants, 4 na steamfitter union members, US figure skating champions asin sarong Filipino Police Colonel.
