NAGA CITY – Mapakol sa labi 7,700 na online gaming websites an piglalapigotan na i-shutdown ngunyan kan Philippine Amusement and Gaming Corporation (PAGCOR).
Sa pagdangog kan Senado, sinaysay ni PAGCOR Chairman Alejandro Tengco na puon kan magtukaw ini sa opisina, nai-report ninda an nasa 7,747 na illegal operators kan mga online games sa mga otoridad.
Sigun man ki PAGCOR Senior Vice President Raul Villanueva, puon kan Setyembre 2022 an pigmo-monitor na ninda an gabos nin illegal sites bako sana an mga illegal na online games kundi kaiba na man digdi an e-sabong, facebook ads, mobile applications, offshore sites asin mga spam messages siring sa telegram chats kun saen nag-a-advertise digdi ni mga illegal game.
Sa numerong ini, 5,793 o 74.78 percent an naipa-blocked kan PAGCOR mantang nasa 1,954 na illegal online gaming websites pa an aktibo.
Duwang paagi soboot an ginagamit ninda tanganing dagusan nang mapuho an mga illegal na e-games, ini an pag-block sa mismong website o sa uniform resource locators (URLs) asin payment blocking.
Sa payment blocking soboot an nakipagkoordenar na an PAGCOR sa Gcash asin Maya mantang nagrani na man an ahensya sa Google asin Apple tanganing ipa-shutdown o maipahali sa saindang mga play store an mga application kan mga illegal na online gaming site.
