NAGA CITY- Preparado na an nasa 80 classrooms na gagamiton para sa ikokondusir na Civil Service Examination sa maabot na Dominggo sa Camarines Sur National Highschool.
Sa entrevista kan Bombo Radyo Naga ki Dr. Sulpicio Alferez, Principal kan nasambitan ng eswelahan, sinaysay kaini na duwa hasta tolong bulan antes an eksaminasyon naipaliwanag na sa sainda an gabos na kaipuhan na ipreparar orog na an mga classroom na gagamiton.
Nagkaigwa naman nin orientation sa mga paratukdo na magseserbi komo proctor.
Huli man sa masikip na espasyo sa main campus mas pinagmarhay na sana ninda an sa Liboton Campus na kan eskwelahan isagibo an nasambitan ng eksaminasyon.
Kun sain naka arrange naman an mga tukawan na igwa sana nin 30 sa laog kan sarong classroom, mantang an iba man an yaon na sa luwas.
Nakaset na man an saindang theme, magin an mga pangaran asin room numbers kan mga examinees.
Pag-abot naman sa seguridad preparado naman ini asin nagkaigwa na nin koordinasyon para sa kasalbaduhan kan gabos na exam asin kan mga paratukdo na maserbi digdi.
Dugang pa kan opisyal na baku naman ining bago para sainda huli ta duwang beses taon-taon pigkokondusir an siring na aktibidad sa saindang eskwelahan.
