Kaibahan an nasa 841 na eskwelahan sa pilot run kan nirebisang Senior High School (SHS) curriculum na pupuonan sa maabot na school year 2025-2026.
Sa briefing sa House Committee on Basic Education and Culture, ipinaliwanag ni Department of Education Undersecretary Wilfredo Cabral na nasa 727 na eskwelahan an inisyal na nilista na “highly ready” kan maiba sa trial o pilot run kan mas pinakusog pang programa para sa mga estudyante sa Grade 11 asin 12.
Alagad nagdesisyon an central office na ibali an mga pribadong eskwelahan asin rural schools na pigkonsiderar komo “moderately ready” kaya sa pangkabilogan nasa 841 na eskwelagan an kaibahan sa partial lists.
Ini an katampad kan 6.60% kan labi 12,000 na eskwelahan kan SHS sa bilog na nasyon.
Nasa 580 digde an pampublikong eskwelahan mantang 261 man an mga pribadong eskwelahan.
Sa oras na magpuon an pilot run kan nirepasong curriculum, masusing susubaybayan ini kan DepEd.
Saro sa mga importanteng features kan bagong curriculum iyo an pagbawas kan core subjects gikan sa 15 na pigtatangro kada semester, lima na sana sa bilog na taon sa Grade 11.
An limang bagong asignatura iyo an Effective Communication (Mabisang Komunikasyon), Life Skills, General Mathematics, General Science, asin pag-aadal kan Historya asin Lipunang Pilipino.
Nakatalaang magbukas an SY 2025-2026 sa Hunyo 16, 2025 asin matapos sa Marso 31 kan masunod na taon.
