NAGA CITY – Ipapauktaba muna kan labi 90 pampublikong eskwelahan an pagbubukas nin klase makalihis an panlalamasa kan nag-aging Super Typhoon Carina asin Habagat sa Metro Manila asin iba pang mga rehiyon sa nasyon sigun ki Education Secretary Sonny Angara.
Kabali sa mga siyudad na ililipat an petsa kan pagbubukas nin klase an mga pampublikong eskwelahan sa Malabon city sa Hulyo 31 mantang sa Valenzuela city an mabukas nin klase sa Agosto 5 sa imbes na sa Hulyo 29 na naenot na pig-anusyar na schedule.
Sigun sa sekretaryo, piglalaoman na malangkaw pa an numero kan mga eskwelahan na mapautob nin late opening kan mga klase sa mga masunod na aldaw.
Meintrastanto, pighahalat kan DepEd an reports kan iba pang regional directors katakod sa rekomendasyon kan pagpapauktab sa pagbubukas nin klase sa saindang nasasakupan.
Kadaklan sa mga apektadong pampublikong eskwelahan an naikurit sa NCR, Region 3 asin Region 4 na sigun ki Sec. Angara an igwa nin sadiring discretion kun nuarin sinda posibleng mabukas nin klase.
Sa ibong na lado, dagos man an klase sa mga pampublikong eskwelahan sa nasyon sa Lunes, Hulyo 29, 2024 sigun ki Presidente Ferdinand Marcos Jr.
Sa ambush interview sa presidente sa pagbisita kaini sa San Mateo, Rizal, sinaysay kaining dagos pa man an klase orog na kun nasa kondisyon man an mga edicio asin dae marhay naapektaran.
Alagad pag-abot soboot sa mga apektadong esklwehana an desisyon na kan mga eskwelahan kun ipapadagos o iaatras muna an pagbubukas kan klase. Pwede man soboot isagibo an klase sa luwas kan mga klasroom.
