Naipasakamot na kan mga prosecutor kan International Criminal Court (ICC) an labi sa 1,300 pidaso nin ebidensiya sa kampo ni dating Presidente Duterte sa nakalihis na pitong bulan kan nakalihis na taon.
Basado sa dokumentong may petsang Disyembre 24, 2025, na isinapubliko sana ngunyan na semana, Ipinaaram kan Office of the Prosecutor sa Pre-Trial Chamber (PTC) I na kabilugang 1,303 pidaso nin ebidensiya na an saindang nai-disclose sa depensa magpuon Hulyo 7 hasta Disyembre 18.
Nasa 906 digde an pigkonsiderar komo incriminating, 389 an ikinategorya komo “rule 77 evidence” na pwedeng inspeksiyunon kan depensa asin an natatadang walo an pig uri komo “PEXO” o potentially exonerating.
Bagaman dae na idinetalye pa an mga ini huli sa confidentiality kan mga ini, ipinaliwanag kan Office of the Prosecutor na kabali sa incriminating evidence iyo an mga insidente kan paggadan sa kasagsagan kan barangay clearance operations siringman an mga paggadan sa darakulang targets sa kasagsagan kan panunungkulan ni Duterte komo Presidente kan Pilipinas.
An nasambitan ng dokumento an pirmado ni ICC Deputy Prosecutor Mame Mandiaye Niang. Mientrastanto, an batch kan mga ebidensiyang iniluwas makalihus an Hulyo 1 an dae gagamiton sa mga pagdangog para sa pagkumpirmar kan kaso laban ki Duterte, na itatakda pa sana an petsa kun nuarin ini idaraos makalihis ipagpauktaba gikan sa orihinal na petsa kan nakalihis na Setyembre 23, 2025.
