Matrayumpo na naisalbar kan gobyerno kan Nigeria an Poco mas o menos 100 estudyante na dinukot kan nakalihis na bulan asin dinara sa kabisera kan Minna.
Dae naman pigheras kan gobyerno an detalye kan operasyon, kun ini talaga an naisagibo sa paagi kan negosasyon o ransom.
Pig-omaw ni Nigerian President Bola Tinubu an mga rumespondeng team asin pighurot na dapat maibalik nin salbado an gabos kan biktima kan kidnapping sa nasyon.
Nag promisa man ining pahihiguton an seguridad tangani malikayan an pagdakol kan siring na insidente.
Pigkokonsiderar na saro sa pinakadarakulang mass kidnapping sa nasyon an nangyari, kun saen sigun sa Christian Association of Nigeria, labi sa 300 estudyante asin 12 kawani kan gobyerno an dinukot, asin 50 sa mga ini an primerong nakatakas.
Nagkawsa nin mahewasang kaanggutan sa publiko an insidente, orog na sa hampang kan naglalalang kaso nin kidnapping sa mga eskwelahan sa hilagang bahagi kan Nigeria.
Mientrastanto, pigtintaan kan Estados Unidos asin Nigeria an sarong joint agreement para sa pagbilog nin sarong task force na obhetong pakusugon an seguridad asin labanan an terorismo sa nasyon.
