NAGA CITY- Inarestar kan mga kabuhan kan Criminal Investigation and Detection Group (CIDG) an labi sa 60 persona makalihis an pigkondusir na raid sa sarong bulangan sa Camaligan, Camarines Sur.
Sa entrevista kan Bombo Radyo Naga ki PC/Insp. Ronnie Fabia, provincial officer kan CIDG-Camarines Sur, sinaysay kaini na ni-raid ninda an Camaligan Sports Center sa barangay San Roque makalihis na makaresibe nin impormasyon na dae nag-agi sa maninigong proseso an operasyon kan bulangan na pigmamanehar suboot kan sarong Roaman Fulgentes.
Sigon saiya, 500 na persona an inabutan ninda sa nasambitang bulangan alagad solamenteng 61 na sana an naarestar kan mga kapulisan.
Inaaram pa ngonyan kan mga kabuhan kan CIDG-Camarines Sur kun totoo an impormasyon na igwa suboot nin nagkapirang mga pulis asin opisyal kan gobyerno an kabale sa mga nakadulag sa nasambitang operasyon.
Tinawan doon ni Fabia na an operasyon ninda parte kan mas pinahigot na kampanya kan Duterte Administration laban sa iligal na sugal sa bilog na nasyon.
