NAKAREKORD sa dai mababa sa 40 Milaor Municipal Police Station nin aksidente sa banwaan nin Milaor sa enot na duwang bulan sana kan taon. Base sa datos kan pulis, kadaklan sa mga insidente imbwelto an banggaan nin mga lunadan asin motorsiklo sa mga mayor na tinampo kan banwaan.
Sa entrivista kan Bombo Radyo Naga ki PLT Joffry M. Matamorosa, Deputy COP kan Milaor Municipal Police Station, nagluluwas sa inisyal na imbestigasyon na human error an mayor na kawsa kan kadaklan sa mga aksidente. Kabali digdi an dai pagsunod sa mga ley sa trapiko, sobrang rikas, asin kawaran nin supisyenteng pag-iingat mantang nagmamaneho.
Igwa man nin nagkapirang kaso na pig-kokonektar sa mechanical malfunction kan behikulo alagad nagkaigwa nin diit na pagbaba sa bilang kan mga aksidente na imbwelto an mga naka-inom. Alagad, padagos an pagirumdom kan pulisya sa mga motorista na siguraduhon na nasa marhay na kamugtakan an saindang lunadan bago magbyahe asin ibitaran an pagmaneho mantang nakainom.
Sa bagay na ini, piglalaoman kan pulisya an mas mahigot na pagpapautob kan mga ley sa trapiko asin an pagbugtak nin dugang na police visibility sa mga mayor na tinampo tanganing mabawasan an bilang kan mga aksidente sa mga masunod na bulan.
