NAGA CITY-Labing kaogmahan, iyo ini an nagin reaskyon kan lado kan center for international law asin kaparientes kan war on drugs sa pagsayuma kan ICC sa interim release na hagad kan kampo ni Dating Presidente Rodrigo duterte.
Sa entrevista kan Bombo Radyo Naga ki Atty. Gilbert Andres (ICC Accredited Lawyer, Executive Director Of Center For International Law), sinaysay kaini na, ini na an komo simbag sa pangadyion kan mga kapamilya kan mga nagin biktima kan EJK sa nakalihis na administrasyong Duterte.
Sigun ki Andres, an standard kan Appeals Chamber sa desisyon iyo an kun igwa nin material error in fact o in law, kun igwa nin magabat na sala sa datos o sa ley na ginibo an Pre Trial Chamber, alagad mayo nin nahiling na ano man na sala an lado man kan Appeals Chamber.
Huli ta nagin reasonable man an pagbasa kan gabos na mga isinumiter na ebidenya asin ibang mga datos, kaya man kinatigan an nagin pagbasura sa nasambitan ng paramientras na paglaya kan dating opisyal.
Susog sa Pre Trial Chamber, bakong bastante an mga kundisyones na pig proposed kan depensa.
Mayo sa rome statute na sarong dahilan sa pag relase sa sarong detainee an pigsaysay kan depensa na dae pigsaalang-alang an humanitarian grounds o alleged na kondisyon ni Duterte.
Buot sabihon sana, antes pa man an nagin desisyon kan ICC, pigkokonsiderar na imposible na na katigan an kahagadan na interim release orog na ta an nagin kasong pigkahampang iyo an Crime against humanity.
Sa ibong na lado, enkaso man na naaprubaran kuta an hagad na release, mapapasiring si Duterte sa nasyon na pigsasabing bilog na aakuon ini alagad igwang manlaen laen na mga kundisyon asin limitasyon.
Sa ngunyan, matinir sa detension center sa ICC si Duterte asin dae na makakapuli pa sa nasyon huli ta kaipuhan kaining hampangon an mga nagin kaso.
