Gadan an dae mababa sa 16 katawo sa Texas asin Ohio, USA makalihis an mga serye kan matinding pag-baha kawsa kan makusog na bagyo sigun sa National Weather Service (NWS).
Kaiba sa mga biktima an 10 tawo gikan sa Tennessee asin iba pang mga insidente sa Missouri, Kentucky, asin Arkansas.
Kasabay kaini an marekas na palangkaw kan mga salog huli sa mayong untok na mga pag-uran asin naireport kan aldaw ni Sabado (kan Domingo sa Pilipinas) an padagos na mga pagbaha sa mga masunod na aldaw.
Sigun pa sa NWS, pirang lugar an piglalaoman na makakaeksperyensiya nin “major flood stage,” na posibleng magkawsa kan mahewasang danyos sa mga tinampo, tulay, asin iba pang imprastruktura.
Nagkaigwa man nin pagkauktaba sa interstate commerce, partikulamente sa mga pangenot na hub kan kargamento sa Louisville, Kentucky, asin Memphis, na posibleng magkawsa kan pagkaantala sa mga suplay kan pagkakan.
Sigun pa sa forecasters, an matinding pag-uran kawsa kan maraot na panahon puon pa kan Biyernes an kawsa kan mainit na temperatura, dara kan makukusog na duros, asin pag-steam kan moisture gikan sa kadagatan kan Gulf of Mexico.
Pigreport pa kan NWS na igwa nin duwang tornado na naobserbaran sa Missouri asin Arkansas.
Saro sa mga tornado, harani sa Blytheville, Arkansas, an nagdara nin mga debris na nagpakol sa 7.6 kilometro an langkaw. Basado sa emergency management office kan Arkansas an danyos sa 22 county an kawsa kan tornado, makukusog na duros, hail, asin mga pag-baha.
Mientrastanto, padagos an huma sa mga apektadong komunidad mantang naglalangkaw ang antas kan tubig baha, pinapalala pa kaini an epekto kan kakulangan kan mga personahes kan NWS makalihis mag-cut nin mga personnel an administrasyong Trump kasuarin sana.
