NAGA CITY – Naeeksperyensiyahan sa dakulang parte kan United Kingdom an labing snowfall.
Sa report ni Bombo International News Correspondents Paul Ledesma, sinaysay kaini na labing distroso an dara kan nasambitan ng snow, kun saen nagpuon soboot ini kan nakalihis na aldaw.
Dugang pa ni Ledesma, bandang ala-una nin mag-oomagahon ngunyan na aldaw nasa 2 degrees centigrade an lipot na namamatean asin kun dae soboot matunaw an mga nyibe dara kan uran ma-freeze giraray ini kun saen an mga tinampo an magigin mahalnas.
Sigun pa ki Ledesma igwa pang weather warning sa saindang lugar, kun saen pig-extend ini hasta saagang ala-6, huli man ta pwede ining makadanyar sa buhay asin pwede man na magkaigwang peligro sa pagbiyahe huli sa maraot na kamugtakan kan mga tinampo.
Katakod digde, igwang mga ibang parte kan lugar na dae na maagihan, kaya man apektado bako sana an delivery courier service pati naman an health care orog na sa mga pasyente na naghahalat sa saindang harong tanganing matawan nin bulong.
Alagad sa sitwasyon soboot ngunyan, masakit para sa mga healthcare workers an magpasiring sa nasambitan ng lugar.
Mientrastanto, an pag-uran man sa ibang parte kan nasyon harani sa London, an nagkawsa nin pagbaha sa mga riles, kaya man kaipuhan na maluway sana an pagpa-andar kan tren.
Pag-abot man soboot sa mga palupadan, labing naapektaran an north side kan nasyon kun saen pigpasarado an runway kan manchester asin john lennon airport kan liverpool kan nakalihis na aldaw nin Domingo alagad ini man tulos pigbukasan pagkaudto sa parehas na aldaw kaya nagpadagos na an operasyon kan nasambitan ng duwang airport.
Pigtawan-duon pa man ni Ledesma na lalaoman man giraray an mga delay asin mga distroso sa lugar bako sana sa airport pati naman sa mga biyahe sa kadagaan.
Sa likod man kan naeksperyensiyahan na labing snowfall sa lugar, igwa pa man giraray soboot mga trabaho an mga residentes huli ta obligasyon kan mga ini na maglaog sa trabaho anuman an mangyari, apwera na sana kun igwang helang.
Sa ngunyan, mensahe na sana ni Ledesma sa kapwa mga Pilipino asin mga residentes kan UK na maglikay asin dae pag-isapalaran an buhay sa luwas.
