Orog na nagkusog pa an pangapudan sa Senado na halion an unprogrammed appropriations sa 2026 budget makalihis magpahayag nin todong pagsuporta si Senate President Pro Tempore Panfilo “Ping” M. Lacson ki Senate President Vicente Sotto III asin man Senate finance committee chairman Sherwin Gatchalian sa nasambitan ng propwesto.
Pigsierto ni Lacson kan nakalihis na Sabado, Oktubre 11 na iibahan kaini an posisyon kan Senado enkaso man na pag iwalan ini kan Senado asin man Kamara sa bicameral conference committee.
Binanggit ni Lacson, na bistado komo mahigot na tagabantay kan kaban kan taumbayan, an mga report kan nakalihis na Biyernes kun saen sinayumahan kan Kamara an propwestong bawasan an P250-bilyong unprogrammed appropriations.
Sa mga report, sinaysay ni House appropriations chairperson Mikaela Suansing na dae soboot kayang halion kan gobyerno an pondo para sa mga foreign-assisted projects.
Kun matinir na magkaiba an posisyon kan Senado asin Kamara, sinaysay ni Lacson na kakampi kan Senado an taumbayan na anggot sa katiwaliang naglataw sa mga maanomalyang proyekto sa flood control asin man imprastraktura.
Naenot nang kinumpirmar ni Lacson asin man kan saiyang staff na may mga flood control project na ginamitan nin unprogrammed funds sa badyet.
Mientrastanto, liwt man na nangapudan si Lacson sa mga lehislador na magpahiling nin self-restraint o pagpupugol sa pagbubutak nin mga individual amendments sa propwestong badyet, asin imbes, magtuon sa mga institutional amendments na bunga kan konsultasyon sa mga lokal na gobyerno.
