NAGA CITY- Mayo na suboot nahihiling an lado ni Vice President Leni Robredo na mga rason na mapahaloy pa sa proseso kan gigibuhong recount kan Presidential Electoral Tribunal (PET) katakod sa electoral protest na pigsangat ni dating Senador Ferdinand ‘Bongbong’ Marcos.
Ini an pahayag ni Atty. Bernadette Sardillo, legal counsel kan bise presidente katakod mkan paparaning manual recount kan mga boto kan 2016 Vice Presidential race na nakatalaan na punan sa Marso 19.
Enot nang sinaysay kan lado ni Robredo na nagsumiter na sinda nin manifestation na nagsasabing kun igwa nin mga mosyon pa sindang naisumiter sa PET na makakapahaloy sa proseso kan recount, isisibog na ninda ini para dagos-dagos na an bilangan kan boto.
Sigon ki Sardillo, mismong si Vice President Robredo na suboot an pauru-utrong nagsasabing mawot na niyang matapos an nasambitang proseso para matuldukan na an pagdududa sa saiyang pagkagana komo bise presidente kan Pilipinas.
Enot kaini, sinaysay kan lado kan Bicolanang bise presidente na pinagirumduman na suboot kan PET an saindang lado asin kan dating senador na irespeto an anumang proseso sa electoral protest enkado magpuon na an recount kan mga balota sa Marso 19.
