NAGA CITY- Arestado an sarong lalaki na pigtutukdong suspek sa panlulugos sa sarong menor de edad sa banwaan nin Goa, Camarines Sur.
Sa entrevista kan Bombo Radyo Naga ki PO2 Maricel Abundavar kan PNP GOA, sinaysay kaini na basado sa pahayag kan 17-anyos na biktima, nagpaaram ini sa saiyang magurang na mapasiring kuta na sa bilar kan saiyang kakilala.
Napaagi suboot an biktima sa grupo kan saiyang mga amigo mantang nag-iinuman an mga ini.
Bigla na sana suboot na dinara kan mga ini an biktima sa laog nin sarong warehouse asin digdi na nilugusan kan suspek na si Robert Fernandez.
Sigon ki Abundavar, aga na kan mahiling an biktima kan saiyang tugang na tulos man na nagpasiring sa saiyang mga magurang asin sa mga otoridad tanganing ireklamo an pangyayari.
Tulos man na nagresponde an mga kapulisan na nagresulta sa pagkakadakop sa nasambitang suspetsado.
Sa ngonyan, yaon na sa kostudiya kan mga kapulisan an nasambitang suspek mantang inaandam na an kasong isasanga laban digdi.
