NAGA CITY- Arestado an sarong suspek sa ikinasang buy bust operation kan mga otoridad sa Brgy. Ibabang Dupay, Lucena City. Binisto an suspek na si alyas Chor, 41-anyos, residente kan Brgy. Poblacion, Padre Burgos, Quezon.
Sa nagunong impormasyon kan Bombo Radyo Naga sa Quezon Police Provincial Office, napag-araman na nakabakal sa suspek an posuer buyer nin sarong pidaso kan heat sealed transparent plastic sachet kan pinagtutubodan shabu gamit an P1,000 komo buy bust money.
Sa inisyal na imbestigasyon kan mga otoridad, napag-aram pa na nakumpiskar pa sa suspek an sarong sling bag na naglalaog nin tolong pidaso kan heat sealed transparent plastic sachet na pinagtutubodan ilegal na bulong.
Sa kabilogan, pigkakarkulong nasa 25.05 grams an mga ilegal na shabu na nakumpiskar sa suspek asin nagkakantidad nin poco mas o menus P511,020.
Sa ngunyan, nasa kustodiya na kan mga otoridad an suspek asin mahahampang sa kasong pagbalgar sa RA 9165.
