Lalaki arestado sa drug ops sa CamSur; 6 sachet nin shabu tinago sa kaha nin posporo
NAGA CITY- Arestado kan mga otoridad an sarong lalaki makalihis an pigkondusir na anti-illegal drug operation sa banwaan nin Pili, Camarines Sur.
Binisto an suspek na si Adolfo Rosanes, 58-anyos.
Sigon ki P/Supt. Errol Garchitorena, hepe kan PNP Pili, pigserbe ninda an search warrant sa harong mismo kan suspek sa barangay Santiago.
Digdi na suboot nakumpiskar an anom na sachet nin pinagtutubudang shabu na yaon sa laog kan kaha nin posporo asin an mga drug paraphernalia.
Haloy na suboot nindang minamanmanan si Rosanes makalihis na matanugan na nagbwelta ini sa transaksyon kan iligal na droga.
Sinaysay man kan opisyal na posibleng ginagamit man komo drug den an harong ni Rosanes huli naman ta igwang nagpapasiring suboot digdi nin mga persona sa alanganon na mga oras.
Isasairarom man sa mararumang imbestigasyon an suspek tanganing maaraman kan mga kapulisan kun saen asin sisay an supplier kaini nin pinapangalad na bulong.
Si Rosanes an tiyuon suboot kan kapitan sa nasambitang barangay asin ini pa an nagpirit sa suspek na magsuko na sa programang oplan tokhang kan gobyerno kan nakaaging taon.
