NAGA CITY- Dae na nag-abot pa nin buhay sa ospital an sarong lalaki makalihis na mapuruhan sa nangyaring pananaksak sa banwaan nin Sagñay, Camarines Sur.
Binisto an biktima na si Adriano Avila, 54-anyos.
Sa inisyal na imbestigasyon kan mga otoridad, bigla na sanang sinaksak kan suspek na si Joey Delos Santos, 21-anyos an biktima sa saiyang lawas.
Tulos man na idinalagan sa ospital an biktima alagad pigdeklarar na ining dead on arrival kan mga doktor.
Sa ngonyan, nagpapadagos pa an ginigibong imbestigasyon tanganing maaraman an motibo sa nasambitang panggagadan mantang pighahanap pa man kan mga otoridad an suspek na tulos man na nagdulag makalihis an insidente.
