Aram baya nindo mga ka-bombo, liwat giraray na nabawi kan sarong lalaki na gikan sa Amerika an Guinness World Record para sa igwang pinakadakol na pull-ups sa laog kan 24 oras.
Susog sa report, dati naman pigpurbaran ni Truett Hanes na mapasa an record duwang taon na an nakakalihis kun saen ini nagtrayumpo sa paagi kan paggibo nin 8,100 pull-ups sa itinaong oras.
Alagad an saiyang numero an nalampasan makalihis sana an sarong aldaw kan Australian na si Gary Lloyd na naggibo man nin nasa 8,600 dugang na pull-ups sa laog kan 24 oras.
Gamit an determinasyon asin kamawotan na makua an saiyang dating titulo, pigpurbaran ni Hanes na mag pull-ups sa laog kan 24 oras.
Digde man matrayumpong nakagibo nin nasa 10,001 pull-ups si Hanes na nagtaong dalan sa saiya tanganing mabawi an Guinness World Record para sa igwang pinakadakol na pull-ups sa laog kan 24 oras.
Sa ngunyan, pigsierto na sana kan nasambitan ng lalaki na padagos kaining gagamiton sa tama an kakaibang abilidad na itinao sa saiya kan Kagurangnan tanganing maabot pa an saiyang mga minamawot sa buhay.
