Aram baya nindo mga ka-Bombo, nagputok soboot an sikmura kan sarong 38-anyos na lalaki huli sa pag-inom nin cockatil na igwang liquid nitrogen na pigpreparar kan sarong celebrity chef.
Nangyari an insidente sa “Igra Stolov” culinary studio kun saen nagpapaluwas nin “cryo-show” an chef gamit an liquid nitrogen tanganing paliputon an inumon asin bugtakan ini nin “dramatic fog effect”.
Sa viral vide, mahihiling na inudyukan pa kan chekf an biktimang si Sergey na inumon tulos an cocktail, alagad paglagok kaini, tulos na nagbuga nin aso gikan sa saiyang nguso asin nagbagsak sa salog huli sa matinding kulog.
Huli sa pangyayari, tulos man na idinara an biktima sa ospital asin nagsairarom sa emergency surgery makalihis na madiskubre kan mga doktor na nagputok an tulak kaini huli sa marekas na reaksiyon kan kemikal.
Pagiromdom man kan mga eksperto, an liquid nitrogen an igwang temperaturang -196°C asin kun maglaog sa lawas kan tawo, marekas ining nagigin gas asin nag-eexpand nin kadakol na beses an dakula, na nagigin rason kan matinding internal pressure na kayang magraot sa organs.
