Aram baya nindo mga ka-bombo, sarong 22-anyos na lalaki an nagtinir nin haros tolong aldaw sa 12-meter na balon makalihis na mamaluan kan mga residente sa lugar an saiyang hibi na gikan sa multo.
Basado sa report, dae pa malinaw kun ano an pakay ni Liu Chuanyi sarong Chinese national sa kabubuludan na parte kan border sa pag-ultanan kan Thailand asin Myanmar kun saen aksidente soboot ining nahulog sa luma na balon.
Alagad, pinagtutubudan kan mga otoridad na nagtre-trekking an lalaki sa nasambitan ng lugar kan mahulog ini sa 12-meter na balon na nagin rason tanganing magsapo ini nin seryosong lugad, fractured wrist asin cerebral concussion.
Sa enot, pigpurbaran na magkurahaw kan lalaki alagad makalihis sana an pirang oras nag-untok ini makalihis na marealisar na dae madadangog kan mga residentes sa lugar an saiyang boses.
Sa ibong na lado, para man sa namamanwaan sa area, gikan sa saindang pinagtutubudan na multo an nadadangog na hibi sa balon kun kaya dae soboot ini pigpansin.
Nagtinir nin haros tolong aldaw an lalaki sa balon na mayong tubig, pagkakan asin kaipuhan na ireserba an saiyang energy.
Sa kabutihang palad, igwang nag-alerto sa mga kapulisan sa tanog na gikan sa kabubuludan kun kaya nagdesisyon an mga pulis na mag-search sa area asin digde na nahiling an lalaki na yaon sa balon.
Nag-abot nin haros 30 minuto an rescue operations alagad salbado man na naisalbar an nasambitan ng lalaki.
