NAGA CITY- Patay ang isang lalaki matapos mahagip ng isang tricycle habang nagbibisekleta sa Barangay San Antonio Poblacion, Nabua, Camarines Sur.
Kinilala ang biktima na si Raul Payadan, 50-anyos, residente ng Barangay Paloyon Prope sa naturang bayan.
Sa nakalap na impormasyon ng Bombo Radyo Naga sa Camarines Sur Police Provincial Office, nabatid na binabaybay ni Dindo Generel, 53-anyos, ang kahabaan ng National Road papuntang Poblacion, Nabua nang masagi ng tricycle nito ang nagbibisikletang si Payadan.
Dahil sa insidente, nagtamo ng sugat sa iba’t-ibang bahagi ng kaniyang katawan ang biktima.
Dinala pa sana sa ospital si Payadan ngunit, ideniklara na itong dead on arrival ng mga doktor.
Samantala, nasa kustodiya na ng mga awtoridad ang suspek para sa karampatang disposisyon.
