NAGA CITY – Patay ang isang lalaki matapos makasalpok ang minamanehong motorsiklo sa Tiaong, Quezon.
Kinilala ang biktima na si Frederick Villar Latayan, 38-anyos, residente ng Brgy. Bukal Norte, Candelaria, Quezon.
Sa nakalap na impormasyon ng Bombo Radyo Naga sa Quezon Police Provincial Office, napag-alaman na habang binabagtas ni Latayan ang southbound direction sa nasabing lugar ng bigla umano itong lumiko dahilan para makasalpok sa truck na minamaneho naman ni Ronel Binanda Lumbayan, 39-anyos, residente ng Brgy. Balubal, Talakag, Bukid mula sa kabilang direksyon.
Sa inisyal na imbestigasyon ng mga awtoridad, nabatid na nagtamo ng sugat sa ulo at iba’t-ibang bahagi ng kaniyang katawan ang biktima na naging dahilan ng agaran nitong kamatayan.
Sa ngayon, nagpapatuloy pa rin ang isinasagawang imbstigasyon ng mga awtoridad hinggil sa nasabing insidente.
