Aram baya nindo mga ka-bombo, si Frank Tavares an ipinangaki komo sarong lalaki sa Dominican Republic alagad sa laog kan 22 na taon, ini an nabuhay komo si Sister Margarita sa duwang magkaibang kumbento.
Sa laog kan nasambitan ng halawig na panahon, mayo siisay man an nagduda sa saiya na bako ining totoong babae. An kakaibang istorya kan pig-aapod na nun-man an nagpuon kan ini 4-anyos pa sana.
Sigun ki Frank an saiyang pamilya an naimbwelto sa sarong aksidente sa behikulo na nagin rason tanganing bawian nin buhay an saiyang mga magurang.
Katakod kaini, an saiyang mga Lolo asin Lola an maluya na asin labi man an pagteos na rason tanganing dae ninda maataman si Frank kan panahon na idto. Huli kaini, nagdesisyon an mga ini na itao si Frank sa mga madre sa sarong Dominican convent.
Dugang pa ni Frank kaidto sadit soboot an saiyang genitals kaya nadisilan ining hanapon na rason tanganing padakulaon ini komo sarong babae sa kumbento.
Nagsusulot nin gubing pang-babae si Frank asin pig-adaptar an mga gawi-gawi kan mga madre siringman nagin kabali sa mga aktibidad sa kumbento.
Alagad kan magtungtong sa edad na 7-anyos, digde na narealisar ni Frank na ini an sarong totoong lalaki alagad nagdesisyon man giraray na mabuhay komo sarong babae sa takot na walaton ini kan saiyang nadakulaan na lugar.
Kan magtungtong man nin teenager si Frank digde na nagpuon na makamate ini nin atraksyon sa mga kaibahan na madre sa kumbento na nagresulta tanganing mabados an saro digde.
Ini man an rason tanganing maghali si Frank sa nasambitan ng lugar asin nagbalyo sa saro pang kumbento kun saen saiyang nabisto si Silvia alagad siring kan dati, nabados man ini.
Sa pinakahurihan kan istorya, saro sa mga paratukdo an nadiskubre an surat ni Frank ki Silvia kun saen digde nakapalaog an saiyang totoong kasarian.
Kan taong 1979 huli ta naibuyagyag na an sekreto ni Frank kun kaya naghali na ini sa kumbento asin nagpuon na mabuhay komo sarong lalaki na kalaunan an nakahanap nin trabaho komo mananahi na hasta sa ngunyan an saiyang ginigibo sa edad na 73-anyos.
Sa ngunyan, an kakaibang istorya ni Frank an na-featured man sa manlaen-laen na shows asin nagin basehan sa pagkriar kan duwang libro.
