Aram baya nindo mga ka-bombo, sarong 32-anyos na Indian na lalaki an pig-ako na saiyang pinutol an apat na muro sa tuong kamot tanganing makalikay na magpadagos na magtrabaho komo computer operator sa kompanya kan saiyang kaparientes.
Basado sa report, sarong Mayur Tarapara an nagpasiring sa sarong police station tanganing ireport an saiyang nawawarang apat na muro.
Susog sa istorya ni Tarapara, mantang pigmamaneho kaini an saiyang motorsiklo pasiring sa harong kan saiyang amigo kan biglang malula asin mawaran nin malay tao sa tinampo.
Kan maggimata soboot ini makalihis an 10 minuto saiyang napansin na mayo na an saiyang apat na muro. Katakod kaini, tolos na pigtubudan kan mga kapulisan an istorya ni Tarapara nin huli ta pwede soboot na pighabon an muro kaini tanganing gamiton sa sarong black magic rituals.
Alagad makalihis an nagkapirang imbestigasyon pa, digde na ninda napag-araman na dae nagsasabi nin totoo si Tarapara.
Pig-ako man ni Tarapara na saiyang ginibo an nasambitan ng paghahambog nin huli ta nasusupog ining magsabi sa saiyang mga kaparientes na dae na matrabaho sa saindang diamond company.
