ARAM baya nindo mga ka-bombo, arestado kan mga kapulisan sa Japan an sarong lalaki na igwang pangarang Hiroaki Katsu, sarong office worker sa Nagakute City sa Aichi prefecture huli sa paghahabon nin mga sapatos kan mga babae saka kaini riribayan nin bagong padis.
Sigun sa mga imbestigador, igwang labi 20 padis kan pambabaeng sapatos sa saiyang pig-uupahan na apartment.
Manlaen-len na style asin sizes kan mga sapatos an nakua asin gabos kan mga ini an nagamit na.
Nadakop si Katsu makalihis magreklamo an sarong 23-anyos na music teacher sa mga pulis kan mapansin na igwa ining winalat na sapatos sa saiyang locker an misteryosong nagin brand new liwat.
Sigun sa music teacher, nakilhag ini kan saiyang isulot an sapatos nin huli ta saiyang namatean na bago na ini kun ikukumparar sa dati na haros pudpod na an suwelas kan saiyang iwalat sa saiyang locker.
Huli sa sumbong kan music teacher, nag-imbestigar an mga pulis sa Nagakute City asin napag-araman ninda na kadakol na kababaihan na palan sa saindang lugar an misteryosong nagigin brand new an saindang mga lumang sapatos.
Sa tabang kan mga salaysay kan mga biktima, nasusod kan mga imbestigador si Katsu asin tolos na pig-ako man kaini an paghahabon kan mga lumang sapatos kan mga babae huli ta mawot kaini na parungon.
