Aram baya nindo mga ka-bombo, sarong lalaki na gikan sa Japan an pigbisto komo si Uncle Praise.
Ini nin huli ta an saiyang hanapbuhay an pagtindog sa mga kalye asin pag-omaw sa mga estranghero na saiyang nahihiling.
Nagin sentro kan bareta sa Japan kan nakalihis na Setyembre 2024 an nasambitan ng lalaki kasabay kan pigpaluwas na halipot na short documentary kan saiyang kakaibang profession.
Basado sa report, an 43-anyos na si Uncle Praise an dati soboot nagtrabaho sa sarong kompanya sa saiyang hometown na Tochigi alagad ini an nalulong sa sugal na nagin rason tanganing walaton ini kan saiyang mga kaparientes asin mawara an saiyang trabaho.
An nasambitan ng pangyayari an nagin rason tanganing magbago an lalaki.
Susog pa sa report, pangaturugan na ni Uncle Praise na magin street performer alagad nin huli ta mayong talento sa pagkanta, pagbayle asin magic tricks naisipan na sana kaini na magin hanapbuhay an pag-omaw sa mga tawo karibay kan kadikit na kantedad nin kwarta.
Makalihis na magin viral sa social media, nagpuon na ining magkaigwa nin business trips sa Japan asin nakabisita na sa 31 prefectures kan nasyon tangani sanang mag-omaw nin tawo.
Sa pangkabilugan, nag-abot sa labi 30 katawo kada aldaw an saiyang na-oomaw asin nagkikita ini nin nasa 10,000 yen o $65.
