NAGA CITY – Sugatan ang isang lalaki matapos mabundol ng isang kotse ang isang motorsiklo sa Brgy. 1 Sabang Calauag, Quezon.
Kinilala ang biktima na si Bryan Ballesteros, 40-anyos, residente ng nasabing lugar.
Sa nakalap na impormasyon ng Bombo Radyo Naga sa Quezon Police Provincial Office, napag-alaman na habang binabaybay ng biktima ang kahabaan ng Maharlika Highway gamit ang kaniyang motorsiklo nang mabundol ito ng kotse na minamaneho naman ni Ariel Bataller, 52-anyos, residente ng B2 L89 PH2 Ext Mabuhay Paliparan 1 Dasmarinas Cavite mula sa kabilang direksyon.
Sa inisyal na imbestigasyon ng mga awtoridad, nabatid na mag-oovertake sana sa isa pang behikulo si Bataller nang mangyari ang insidente.
Kaugnay nito, nagtamo ng mga sugat sa iba’t-ibang bahagi ng kaniyang katawan ang biktima na agad namang dinala sa ospital para sa asistensiya medikal.
Sa ngayon, nasa kustodiya na ng mga awtoridad ang suspek para sa karampatang disposisyon.
