NAGA CITY – Sugatan ang isang tricycle driver matapos pagtatagain sa Barangay Balagbag, Milaor, Camarines Sur.
Kinilala ang biktima na si Ariel Balote, 54-anyos, residente ng nasabing lugar.
Sa nakalap na impormasyon ng Bombo Radyo Naga sa Camarine Sur Police Provincial Office (CSPPO), napag-alaman na habang nasa loob ng kanilang bahay ang biktima kasama ang kasintahan nito ng bigla na lamang umanong pumasok ang suspek na kinilalang si Rodelo Octa, 43-anyos, residente sa nasabing lugar.
Base sa imbestigasyon ng mga otorida, bigla na lamang umanong pinagsasasaksak ng suspek ang biktima sa parteng dibdib nito.
Napag-alaman rin na maliban sa sugat na tinamo nito dahil sa pananaksak ay nagtamo rin ito ng sugat sa kilay at kanang braso ang nasabing biktima matapos itong kagatin ng suspek.
Kaugnay nito agad namang isinugod sa ospital ang biktima para sa asistensya medikal habang maswerte namang hindi nagtamo ng tama ang kasintahan ng nasabing biktima.
Sa ngayon, nasa kustodiya na ng mga otoridad ang nasabing suspek para sa karampatang disposisyon.
