NAGA CITY- Mahigot na pinahimutikan kan lalaking naarestar sa banwaan nin Sipocot, Camarines Sur na igwa siyang koneksyon sa rebeldeng New People’s Army (NPA).
Sa ekslusibong pakikipag-olay kan Bombo Radyo Naga ki Erick Estadillo, sinasabing miyembro kan rebeldeng NPA, sinaysay kaini na kadakol an makakapatotoo na saro sana siyang inosenteng sibilyan asin dae siya naimbwelto sa pangungutong para sa makawalang grupo.
An pahayag na ini ni Estadillo katakod kan nangyaring engkwentro suboot sa sitio Traktora, barangay Bagong Sirang sa nasambitang banwaan na nagresulta sa pagkagadan kan pigtutubudang NPA na binistong si Renel Mirabelles.
Bistado niya si Mirabelles asin mayo ining koneksyon sa rebeldeng grupo.
Nanindugan si Estadillo na mayong nangyaring insidente nin pangungutong asin engkwentro sa nasambitang lugar.
Basado sa istorya ni Estadillo, pigsugo siya nin tolong lalaki na magpasiring sa sarong truck na naglalaog nin mga construction supplies aasin digdi na siya pigdakop kan mga militar antes na piglunad sa bihikulo pasiring sa sitio Traktora.
Nakadangog suboot siya nin putok kan badil asin nahiling na sana niya si Mirabelles na nakadapat na alagad mayo man ining kataid na rifle.
Mientrastanto, naglalaom man si Estadillo na mapapatotoohan na mayo siyang kasalan sa kasong saiyang kinakahampang.
Nagtitinir na ngonyan sa Bureau of Jail Management and Penology (BJMP) si Estadillo.
