NAGA CITY- Arestado kan mga otoridad an sarong lalaki na sinasabing nag-iirahay nin mga dae lisensyadong badil sa banwaan nin Calabanga, Camarines Sur.
Sa entrevista kan Bombo Radyo Naga ki PC/Insp. Ronnie Fabia, head kan Criminal Investigation and Detection Group (CIDG) Camarines Sur, sinaysay kaini na piglunsar an “Oplan Paglalansag Omega” sa barangay Paolbo, alas-6:40 nin aga ngonyan na aldaw, Abril 27 na nagresulta sa pagkakadakop kan suspek na si Elmer Bronzal.
Narekober sa suspek an sarong magnum 22, sarong calibre 45 pistol, mga bala, duwang magazine asin sarong granada.
Nagtutubod an mga otoridad na posibleng nakakadugang pa suboot an suspek sa insidente nin mga loose firearms sa banwaan nin Calabanga huli naman sa pag-iirahay kaini nin mga dae lisensyadong badil.
Sinaysay man ni Fabia na dae konektado sa transaksyon nin iligal na droga an nasambitang suspek.
Napag-araman na apwera sa kasong pagbalgar sa RA 10591 o an Comprehensive Firearms and Ammunition Regulation Act, nahahampang pa sa kasong attempted murder si Bronzal.
Nagtitinir na ngonyan sa kostudiya kan CIDG-Camarines Sur an suspetsado para man sa maninigong disposisyon.
