NAGA CITY-Kumpiskado ang lampas 100,000 Pesos na kantidad ng ilegal na droga sa 2 suspek sa ikinasang buy bust operation ng mga awtoridad sa Brgy. Bignay 1, Sariaya, Quezon.
Kinilala ang mga suspek na sina Alyas Nemesio/Emie, 45-anyos, residente ng Brgy Guis-Guis San Roque, at si Alyas Onad, 38-anyos, residente ng Brgy Lutucan Bata, sa nabanggit na lugar.
Sa nakuhang impormasyon ng Bombo Radyo Naga sa Quezon Police Provincial Office, napag-alaman na nakabili sa mga suspek ang poseur buyer ng isang piraso ng heat-sealed transparent plastic sachet nang pinaniniwalaang shabu, gamit ang 1,000 Pesos bilang buy bust money.
Sa inisyal na imbestigasyon ng mga awtoridad, napag-alaman na nakumpiska pa kay alyas Nemesio/Emie ang dalawang piraso ng heat sealed transparent plastic sachet ng pinaghihinalaang shabu habang nakumpiska naman kay alyas Onad ang ginamit na buy bust money.
Sa kabuuan, may bigat na humigit-kumulang 5.83 grams ang nasamsam na ilegal na droga sa mga suspek na nagkakahalaga ng P118,932.
Sa ngayon, nasa kustodiya na ng mga awtoridad ang mga suspek para sa karampatang disposisyon.
