Aram baya nindo mga ka-bombo, labi sa 1,400 katao sa Anaheim, California an nakisumaro sa makasaysayang pagkawat nin “Red Light, Green Light” tangani masungkit an Guinness World Record para sa Largest Game of Red Light, Green Light.
Pigsagibo an kawat sa Yorbe Park kun saen kaiba sa mga nag atendir iyo an mga estudyante gikan sa Anaheim Elementary School District, saindang mga pamilya, asin nagkapira pang nagdayo gikan sa ibang distrito.
Nakibali man an ibang mga lokal na bumbero, pulis, asin nagkapirang opisyal kan syudad tangani man makumpleto an record na 1,423 atendees.
An “Red Light, Green Light”, o mas bistado sa Pilipinas komo “Pepsi-7Up”, an sarong kawat na pang aki na kun saen kaipuhan na magdalagan an mga parakawat enkaso sinabing “Green Light”, asin biglang mauntok enkaso man “Red Light”.
An siisay man na maghiro sa sugo na “Red Light” an mahahali na sa kawat.
Nagin mas bistado pa an kawat na ini sa bilog na kinaban makalihis ining mapabali komo primerong deadly game sa sikat na Netflix series na Squid Game.
Sigun ki Guinness Records adjudicator Brittany Dunn, nagin makabuluhan an pagtiripon bakos sana para sa mga kaakian kundi pati na man sa mga may edad, sarong pagirumdom na an pagkakawat an mayong pinipiling edad.
