NAGA CITY- Mahigot na binabantayan suboot ngonyan kan Las Vegas government an nagluluwas na mga fake social media accounts na naghahagad nin donasyon para sa mga nabiktima kan mass shooting sa Mandalay Bay Hotel.
Ini an sinaysay kan Overseas Filipino Worker (OFW) na si Honey na tubong Naga City asin presenteng nagtatrabaho sa sarong Home Health sa Las Vegas sa entrevista kan Bombo Radyo Naga.
Sigon saiya, nangangaipo nin $10 milyon na donasyon para sa mga nagpapabilog nin labi sa 500 na nabiktima nin pambabadil asin an pagpapalubong kan mga nagadan sa indibidwal.
Katakod kaini, mahigot na binabantayan kan gobyerno kan Las Vegas an mga fake social media accounts na ginagamit sa saindang pansadiring interes an paghagad nin donasyon para sa mga biktima kan insidente.
Abiso suboot kan mga otoridad na direktang ipaabot na sana sa mga ospital o kaya sa website kan ‘Go fund me’ kan Las Vegas an nasambitang donasyon.
Sigon ki Honey, apwera sa pera, kinakaipuhan pa nanggad kan mga nabiktima nin mass shooting an dugo asin pagpangadyi makalihis an makangirhat na pangyayari.
