Matrayumpong naisagibo kasubago an launching kan Naga City Digital Innovation Hub asin signing of Memorandum of Agreement (MOA) kan free Wifi sa Jesse M. Robredo Coliseum.
Pinartisiparan ini ni Cherryl C. Ortega, Regional Director kan Luzon Cluster 3, Department of Information and Communications Technology (DICT), Reuel M. Oliver Executive Director kan Naga City Investment Board, Mayor Nelson Legacion asin iba pa.
Sa entrevista kan Bombo Radyo Naga ki Reuel M. Oliver, sinaysay kaining an ma-ukupar sa nasambit na Digital Innovation Hub an mga online workers o freelance workers na igwang kliyente abroad asin local digital start ups, o mga kompanyang naggagamit nin digital technology para magtao nin serbisyo.
Mayormenteng obheto suboot kaini na tabangan an mga lokal na residente na magprodusir nin sadiring produkto asin serbisyo na digital, asin madiskubre an mga marhay na ideya o inobasyon kan mga estudyante na magagamit kan kumunidad sa pagnenegosyo.
Segun ki Oliver, pangiturugan nindang makapoon nin digital ecoystem na maproduce nin produkto asin serbisyo sa laog asin luwas kan siyudad nin Naga.Tinawang doon kaini na sa paagi kan nasambit na lakdang dakol an malaog na investors sa siyudad.
