NAGA CITY– Dakop sa aktong panghahabon nin mga bado an sarong Legazpeño sa merkado publiko kan banwaan nin Bula, Camarines Sur.
Binisto an suspek na si Olivia Barcelon, 57-anyos na residente kan Brgy San Roque, syudad nin Legazpi sa Albay.
Sa ipinaabot na impormasyon kan Bula-PNP, napag-araman na mismong an mga nakahiling ki Barcelon an nagdakop saiya makalihis na maaktuhang nanghahabon nin mga bado sa tiendahan kan biktimang si Raquel Amante, 32-anyos.
Narekober sa suspek an pitong maong na pantalon, anom na short pants, sarong sedang pantalon asin sarong maong na pedal pants.
Pigkakarkulong maabot sa P5,000 an nasambitan na mga gamit na tulos man na naibalik sa biktima.
Sa ngonian, nagtitinir na sa kustodiya kan pulisya an suspek para sa maninigong disposisyon.
